Network
PORTAL MAJALENGKA - Desa Nunuk Baru, Kacamatan Maja, Kabupaten Majalengka, nyaeta salah sahiji wewengkon nu ngamumule trdisi seni budaya.
Euyeub potensi kaaripan lokal nu hade sarta kudu dimotekarkeun. Hal iyeu mindeng dilaksanakeun ku masarakatna sacara antusias.
Saperti halna dina raraga Mieling Milangkala Nunuk nu ka-549 taun, warga ti sababaraha Blok Desa Nunuk Baru, Kacamatan Maja, Kabupaten Majalengka sacara rampak mintonkeun tradisi Tari Lisung, sarta sababraha urang awewe nu tos sepuh ninun gadod (tenun gadod), oge tradisi Nyiramkeun Pusaka, di Alun-alun Desa.
Kagiatan kiwari aya nu beda dina situasi pandemi Covid-19. Masarakat diimbau nerapkeun protokol kasehatan dina ngeusi sababaraha kagiatan seni budaya asli Nunuk.
Diluuhan oge ku Muspika satempat, Disparbud Majalengka, Dekkma, sarta sababraha komunitas seni jeung budaya, oge warga ti sababaraha blok eta.
Numutkeun Kapala Desa Nunuk Baru, Nono Sutrisno, dina raraga ngeusi tradisi seni budaya karuhun iyeu, diantarana, Nyiramkeun Pusaka Nunuk, Guar Bumi, Mapag Pusaka, Tarian Gadod Nunuk, Seni Rampak Lisung, nepi ka pesta rayat nyaeta ngabagikeun hasil tatanen ka masarakat atawa pangunjung.
"Simkuring katut rengrengan mindeng ngalaksanakeun kagiatan Mieling Milangkala Nunuk. Hal iyeu mangrupi wahana anjangsono sareng kulawargi Nunuk. Dieuyeuban oge ku aksi seni budaya warisan karuhun," ceuk Kades Nunuk Baru Nono Sutrisno, Senin 5 Oktober 2020.
Nono umajak ka masarakat sangkan terus ngaronjatkeun potensi seni jeung budaya oge mangrupakeun warisan karuhun, sangkan bisa dijaga, diriksa, tur di mumule.
Lain halna numutkeun Wabup Majalengka, Tarsono D Mardiana, dina ngaluuhan workshop Tenun Buhun Gadod nu bahanna tina kapas honje, di Desa Nunuk Baru, Kacamatan Maja, sababaraha waktu katukang, ngapresiasi tekad Pemkab Majalengka pikeun ngajadikeun pariwisata jadi sektor pangwangunan ekonomi.
